Floksmannadagur byrjaður í Hattarvík
Í morgun sigldi Ritan umleið 70 gestir út í Fugloynna. Hetta vóru gestir hjá bóndafólkunum á Uppistovugarðinum í Hattarvík, Símun og Jastrid Gullaksen, ið hava skipað fyri hesum átakinum í fleiri ár. Steðgur kom í av korona farsóttini, men nú er aftur gongd á.
Vit fóru av Hvannasundi kl. 8.45 í morgun, fyrst á Eiðið á Svínoynni, síðani á Kirkju á Fugloynni og lendu so í Hattarvík, har móttøka var fyri okkum á lendingini.
Tað regnaði av grimd, tá vit fóru av Klaksvík, men so hvørt vit komu longur norður, lætti eitt sindur í. Men fram við landi sást, at ógvusligt regn hevur verið í nátt, tí áirnar vóru stórar.
Hugaligt var at síggja nógva lundan fram við landinum. Ikki minst búðfuglin á norðursíðinu á Svínoynni.
Komin inn eftir Hattarvík, sást roykur frá bálinum, har maturin, ið vit seinni í dag skuldu eta, blívur viðgjørdur. Tað er kjøt frá Uppistovugarðinum ella úr Eystfellinum, ið skal leggjast niður í millum steinarnar, sum bálið er við at hita upp og flag leggjast omaná. Einferð seinnapartin skal hetta átiliga kjøtið síðani borðreiðast fyri gestunum.
Ætlanin er so at eftir morgunmatin, ið nú verður borðreiddur, skal skipast fyri einum gongutúri.
Vit hoyra kanska meira seinni í dag.