Næstu vikuna fara trý lágtrýst at leggja leiðina framvið. Leiðin er eitt sindur norðanfyri, ímillum Føroyar og Ísland. Leiðin, lágtrýstini taka, er avgerandi fyri veðrið í Føroyum. Í hesum føri fer ættin fyri tað mesta at liggja ímillum landsynning og útsynning.

Einki av hesum trimum lágtrýstum er nakað serliga djúp. Tað eru tey vanliga ikki um summarið. Vindferðin fer onkra løtu upp ímóti 10 m/s, men fyri tað mesta um 5 m/s. Tá er roknað við miðalvindferð fyri alt landið.

Tað fyrsta av hesum trimum lágtrýstum merkist longu í dag. Tað fer at seta sín dám á veðrið til seinnapartin mánadagin. Tá er tað farið langt norður í hav, og tað næsta fer at nærkast. Ein hátrýstryggur fer at stinga seg upp ímillum hesi bæði lágtrýstini mánakvøldið, og tá er vanliga gott veður.

Tað næsta lágtrýstið fer at seta sín dám á veðrið í Føroyum til og við mikudagin. Regnið, sum hoyrir til hetta lágtrýstið røkkur ikki til Føroya. Eftir tað fer aftur ein hátrýstryggur at stinga seg upp, men hesaferð liggur hann longri enn mánakvøldið, og hann fer at stinga seg nakað væl longur norður. Tí verður høgætt hósdagin, meðan tað triðja lágtrýstið nærkast.

Fríggjadagin og alt vikuskiftið er aftur lágætt – fer at liggja ímillum sunnan og útsynning.