Ein sera stórur tunfiskur á Sjómannadegnum
Í november í 2021, ringdi John Mikkelsen, skipari á Gøtunes til mín og segði, at teir høvdu fingið ein sera stóran tunfisk, sum hjáveiðu á hesum túrinum í norskum sjógvi. John spurdi um Føroya Sjómannadagur vildi hava hann. Tað vildu vit sjálvandi og eru ógvuliga takksamir fyri, at skip og manningar hugsa um Føroya Sjómannadag, eisini í dagliga strevinum umborð.
John Mikkelsen segði, at hann kundi leggja tunfiskin til frystingar á Pelagic á Tvøroyri. Soleiðis bleiv gjørt, og nú hevur Pelagic fyri fáum døgum síðani, sent okkum tunfiskin.
Fiskurin verður framsýndur leygardagin á Føroya Sjómannadegi. Vit hava viga og mált hann. Hann vigar 726 pund og er 280 centimetrar langur.
Vit takka Varðanum, Pelagic og ikki minst John Mikkelsen, skipara fyri stóra fongin til Føroya Sjómannadag.