Veðrið í vikuni
Hátrýstið, sum hevur givið okkum gott veður í nakrar dagar, fer at flyta seg eystureftir, og so sleppa lágtrýstini nærri Føroyum aftur. Tey fara at ferðast um Ísland í ein landnyrðing.
Føroyar fara at liggja eystan fyri miðjuna á lágtrýstunum, og har er ættin vanliga ímillum sunnan og vestan. Brúgvaløg við regni fara eisini at merkjast.
Veðrið í vikuni – dag fyri dag:
Mánadag: Landsynningur sunnan, lítil og eingin vindur um náttina, men út á fyrrapartin eitt sindur meir, um 3 til 8 m/s. Samdrigið og turt. Um kvøldið veksur vindurin upp í 5 til 10 m/s, tað verður skýggjað, og so fer at regna.
Hitin mánadagin fer at liggja um 8 til 11 stig.
Týsdag: Útsynningur sunnan, um náttina og morgunin undir 5 m/s, men út á seinnapartin 3 til 8 m/s. Skýggjað, regn og ælaveður um náttina og fyrrapartin; seinnapartin samdrigið og turt.
Hitin týsdagin fer at liggja um 10 til 12 stig.
Mikudag: Sunnan um náttina og morgunin, 5 til 10 m/s. Seinnapartin útsynningur, 3 til 8 m/s. Samdrigið ella skýggjað við ælaveðri til nakað er liðið út á seinnapartin. Tað fer at regna alt kvøldið.
Hitin mikudagin fer at liggja um 10 til 12 stig.
Hósdag: Útsynningur, 5 til 10 m/s. Seinnapartin minkar vindurin niður í 2 til 7 m/s. Samdrigið og fyri tað mesta turt allan dagin – tó undantikið middagsleitið, tá ið vit kunnu vænta regn ella ælaveður.
Hitin hósdagin fer at liggja um 9 til 12 stig.
Fríggjadag: Ímillum útnyrðing og útsynning, 3 til 8 m/s. Seinnapartin minkar vindurin niður í 2 til 7 m/s. Samdrigið og skýggjað og fyri tað mesta turt.
Hitin fríggjadagin fer at liggja um 9 til 11 stig.
Leygardag: Útsynningur, 5 til 10 m/s. Skýggjað og fyri tað mesta turt.
Hitin leygardagin fer at liggja um 9 til 12 stig.
Sunnudag: Útsynningur, 13 til 18 m/s. Skýggjað og regn stóran part av degnum.
Hitin sunnudagin fer at liggja um 12 stig.