Veðrið í dag
Sagt er frá einum sindri av vindi í dag. Tað er eitt djúpt lágtrýst, sum í morgun er statt ímillum Føroyar og Ísland. Rundan um tað er nakað av vindi og avfalli, sum vit fara at merkja her í Føroyum.
Forsagnirnar hava ikki allar verið samdar, tí lágtrýstið kemur so nær við okkum.
Í morgun er útsynningur, 10 til 15 m/s. Hetta er hvassur vindur. Avfall hevur verið kring alt landið, men nú er fyri tað mesta turt.
Hetta sær út til at vera veðrið, til nakað er ligið út á fyrrapartin. Tá fer vindurin at veksa upp í 13 til 18 m/s og tað fer at verða ælaveður.
Út á seinnapartin fer vindurin at veksa eitt sindur, upp í 18 til 23 m/s. Mesti vindurin norðanfyri; sunnanfyri eitt sindur minni, 15 til 20 m/s.
Í kvøld fer vindurin at minka spakuliga. Á midnátt eru 13 til 18 m/s. Allan dagin ælaveður.
Í nátt fer vindurin at minka meira. Í lýsingini í morgin – t.e. um 7-8 tíðina – 8 til 13 m/s, og longri ímillum ælini.