KÍ fer at spæla í Hummel
Nýggj klæðna avtala er gjørd við Sport24 í Klaksvík, sum kemur í gildið 1. januar 2023.
KÍ skiftir klæðnamerki frá Adidas til Hummel longu frá komandi kappingarár. Avtalan er galdandi fyri alt felagið.
Tað hevur stóran týdning fyri okkum at alt felagið fær góðar karmar. Avtalan inniber at Sport24 í Klaksvík stuðlar KÍ við klæðum og ítróttarútgerð sum skal stimbra góðar venjingar hjá Betri monnum, kvinnum og sjálvsagt akademinum.
Hummel, ið hevur høvuðsskrivstovu í Århus, passar væl til okkara og møguleikarnir eru nógvir, sigur Rói Clementsen ið er nevndarlimur í Klaksvíkar Ítróttarfelag. Samstarvið við Hummel og Sport24 fer at geva okkum møguleika at framleiða enn fleiri vørur til okkara íðkandi og fjepparar.
KÍ handilin verður útbygdur við alskins nýggjum vørum og klæðum. Tað verður eitt nú møguligt at keypa eina leikarablusu við Djúpumýru á dystardegnum.
Vit vilja somuleiðis takka Thomas Dam Intersport fyri samstarvið tey seinastu mongu árini.