Óførur fiskiskapur
Størru útróðrarbátarnir, sum fyrst í vikuni settu eystanfyri og so fóru vesturum í Vágahavi hava havt eina rættuliga góða viku. Petur Joleiv, Svøðstein, skipari á Líðhamri sigur, at teir hava havt 5 setur hesa vikuna, eina eystanfyri og fýra vestanfyri, tilsamans hava teir avreitt 53.000 pund av útróðrarfiski hesa vikuna.
Vit vóru á støð, tá Líðhamar kom vestanífrá í dag, fyrst løgdu teir at á Stongunum, har Klavus, sum er ein av manningini, sum er í landi og skipar egningina, tók ímóti stampum at egna. Kanska skulu teir vera egndir aftur áðrenn sunnukvøldið ella mánakvøldið. Síðani bleiv loyst aftur og leiðin gekk tvørtur um Vágna yvir á ACFS har Sjúrður Josephsen stóð og bíðaði við sínum kránabili, klárur at landað og fáa fiskin inn á virkið har fiskurin verður seldur á Fiskamarknaðinum mánadagin.
Í nátt hevði Líðhamar 10.800 pund og Norðsøki, sum eisini var vestanfyri hevði 11.500 pund.