Serliga fyrri hálvleikur í dytinum millum Stjørnuna og oddaliðið H71 í KÍ-høllini í dag var rættilga góður og undirhaldandi. Tað gekk javnt á alla hálvleikin, liðini skiftust um at skora, og hálvleiksstøðan gjørdist javnleikur 16-16.                                                                                                                             

H71 kom betur frá byrjan í seinna hálvleiki, og fekk eftir stuttari løtu eina leiðslu upá trý mál, men Stjørnan royndi at svara aftur, og var væl við til seinni hálvleikur var hálvrunnin, tá var støðan 26-28 til H71. Eftir hetta tyktist tað sum, at kreftirnar høvdu hug at ganga undan hjá Stjøruni, og hevði tað m.a. við sær, fleiri mistøkt blivu gjørd serliga á álopspartinum, sum góvu H71 møguleikar at fara í skjót mótálop. Endin varð, at H71 vann dystin 37-30.                                                                                                                                 

Burtusæð frá seinasta korterinum av dystinum, so má sigast, at avrikið hjá Stjørnuni ímóta oddaliðnum, sum í løtuni má metast at vera í einum flokki fyri seg, var gott. Hugburðurin var munandi betur enn í dystinum Í móti Neistanum seinasta sunnudag. Serliga bleiv arbeitt nógv meira avgjørt og avvísandi í verjupartinum, tó at tað enn manglar nakað í.                                                                                       

Samanumtikið kann sigast, at hóast alt, so var nógv positivt hjá Stjørnuni at taka við frá dystinum, men arbeiðast má framhaldandi hart víðari, serliga í móti hálvfinalunum í steypakappingin ímóti Neistanum.

Málin hjá Stjørnuni gjørdu: Mina S. Hendriksen 7, Iulia Nalvik 4, Jancy H. Jacobsen, Tóra Eliasen, Anna Jacobsen, Malene Madsen og Durita L. Johansen 3 mál hvør, Sonja S. á Bergi og Joan Sørensen 2.