Teir vunnu ódnartøkini móti FM-vinnarunum og fáa nýggjan bát til kappingina í ár.

Í NHR er stórur spenningur til Norðing í ár. Í fjør luttók hann á fyrsta sinni í nýggjari tíð og longu í fyrstu royndini á Norðoyastevnu vann Norðingur til gleði fyri mongu áskoðararnar hjá NHR. Í fjør hevði Norðingur avbjóðingar við bátinum, tí mitt í kappingarárinum máttu teir skifta bát, tí Norðingur fekk skaða. Til kappingina í ár fær Norðingur nýggjan bát, sum Sámal Hansen hevur bygt. Báturin verður klárur til Norðoyastevnu.

2022 gav mót uppá meir

Norðingur vann ein róður í 2022, og tað gav mót uppá meir, segði bátsformaðurin Kristmund Petersen við Norðlýsið fyrr í ár.

- Árið í fjør gav okkum blóð uppá tánna, har vit vunnu ein róður. Vit vilja allir gjarna sleppa at prøva at vinna FM, so tað er málið í ár. Fólk norðanfyri trúgva uppá tað, tí tað var tætt í fjør, serliga móti endanum, og vit trúgva uppá tað sjálvir eisini, segði Kristmund Petersen.

Ein partur av manningini frá í fjør heldur fram í ár, men nakrar broytingar eru.