Leingi hava politisku flokkarnir bíða eftir einari útmelding, einum lívstekni frá samgonguni, um hvørja uttanríkispolitisika linju teir fóru at leggja fyri tjóðina. Hálvt ár skuldi ganga, meðan embætisverkið hjá Høgna Hoydal skuldi fyrireika hetta "út í æsir."

Tíðindafundurin á Viðareiði skuldi vera platformur fyri teimum "umfatandi tiltøkunum," sum skulu setast í verk, men vísti hetta seg at vera bluff, tí tiltøkini eru hvørki slóðbrótandi ella umfatandi.

Leingi væntaðu útmeldingarnar frá løgmanni og hansara landsstýri vóru óklárar, avmarkaðar og verst av øllum, skeivar!

Løgmaður úttalaði seg fyrst á Viðareiði fyri øllum fjølmiðlunum og tjóðini, at virksemi hjá russisku fiskiskipunum er vaksandi og teir umskipa nærum 400.000 tons í føroyskum sjógvi. Hetta er beinleiðis skeivt, tí sum tað eisini varð víst á ígjár av KVF, sum hevur tosað við eftirlitsstovnin, Vørn, so er virksemið seinastu árini støðugt minkað hjá russiskum skipum.

Ikki nokk við hesum, so fór løgmaður upp á talarastólin til fyrstu viðgerð av uppskotinum um at geva landsstýrismanninum í uttanríkismálum øktar heimildir til, og endurtók hann somu ósannindi fyri løgtinginum: "Virksemið hjá russiskum fiskiskipum er vaksandi" og "teir umskipa fyri millum 300-400 túsund tons í føroyskum sjógvi."

Sambært Vørn, so eru hesi tølini skeiv, og hevur løgmaður harvið sagt ósatt fyri løgtinginum - hetta eigur at siga seg sjálvt, er sera álvarsamt!

Nógv varð sagt og lovað av hesum somu flokkum um at skula vísa vegin í Russland-samstarvinum undan valinum, og varð tað eisini óivað nýtt sum valagn.

Eitt er, at politiska skipanin hevur bíða eftir samgonguni í hálvt ár eftir einari politiskari linju, men at landsins leiðsla fer út og leggur linjuna grundað á skeiv tøl, tað er átaluvert og eigur at fáa størri umtalu í fjølmiðlunum og ikki tigast niður!

Nevndin í Unga Samband