Tað kostar ikki at vitja kirkjuna, men kirkjubússan stendur frammi, til teirra ið ynskja at leggja eitt oyra. Christianskirkjan og listin í kirkjukjallarinum eru heilt serstøk og vøkur, ja so serstøk, at amerikanarar, ið vit møttu á ferðavinnuráðstevnu í Reykjavík í heyst, viðmæltu okkum at vitja framsýningina og lova, at vit aldrin gloymdu at viðmæla gestum at leggja leiðina framvið. Og um tað er vert at biðja útlendingar vitja, so má tað eisini vera vert at biðja føroyingar vitja.

Tí er kirkjan opin fyri okkum øllum, leygardagin 9. Desember frá kl 14-18, so um tú ikki hevur verið og vitja, so er hetta kanska rætta løtan. Aftaná vitjanina í kirkjuni, er upplagt at leita sær norð til gamla Klakksvígshandilinum, ið er á loftinum á Norðoya Fornminnissavnið.

Tað eru Visit Norðoy og Norðoya Fornminnisfelag ið eru farin í samstarv um hesa spennandi jólaverkætlan, saman við framsýningarsniðgevanum Johan Holm Simonsen. Í stuttum snýr tað seg um at skapa eina enduruppliving av einum handilshúsi frá trýssunum við handli, apoteki, skrivstovum, stovum, pakkhúsi og siðsøguligum aktiviteti uttandura.

Soleiðis fáa allir borgarir, eldri eins og yngri, ágóðan av einari siðsøguligari livandi framsýning, sum vekir góð minnir hjá eldra ættarliðnum, og stimbrar áhugan og týdningin av einari farnari tíð hjá yngra ættaliðnum.

Minnast tit tá vit kliptu jólaeinglar og dukkulisur út? Quality Street av gamla slagnum og reyð sodavatn frá Føroya Bjór kom á borði? Onkuntið er gott at steðga á og geva sær tíð at verða til staðar og kanska klippa út við børnum ella ommubørnum.

Gamli Klakksvígshandilin er opin leygardag og sunnudag frá kl 16-20. Vita eftir, um ikki mangt annað áhugavert er at vitja og uppliva í Klaksvík í vikuskiftinum. Kanska tað er svimjuhøllin ið lokkar, mongu góðu handlarnir ella ein góður kaffimuður og kakao Café Fríða?