Næstu dagarnar fara fleiri lágtrýst at leggja seg á leiðina við Kappan, og tey fara at sleingja brúgvaløg ímóti okkum við regni. ímillum tey er annaðhvørt ælaveður ella løtur við turrveðri.

Byrjandi við veðrinum í løtuni, so er eitt lot, um 5 m/s, av landnyrðingi eystri. Skýloftið er skiftandi – í støðum sólglottar, eisini drúgvar løtur, í øðrum støðum nakað væl gráari við onkrum hissini æli. Hitin liggur um 2-3 stig; í støðum tó nærri frostmarkinum.

Ikki nógv broyting frá hesum veðri í dag.

Í nátt fer vindurin at veksa – úr einum lítlum loti, 5 m/s, upp í ein strúk í vindi, 13 m/s. Hetta verður á middegi í morgin. Skýloftið um náttina og morgunin smá- ella hálvskýggjað og bert okkurt ælið, men fram ímóti middegi dregur á luftina, og tað fer at regna.

Vit skulu rokna við, at tað regnar allan seinnapartin í morgin og út á kvøldið eisini. Hitin nøkur stig uppeftir – upp í 4 til 9 stig.

Sunnunáttina er brúgvalagið farið framvið, og hann støkkur vesturum. Veðrið sunnudagin fer at vera eitt lot til frískt lot av útsynningi, 3 til 8 m/s, loftið smáskýggjað og yvirhøvur turt. Um kvøldið er ættin niður í sunnan, og tá minkar vindurin niður í eitt lítið lot, um 5 m/s. Tá fer eisini at draga á luftina, og okkurt ælið verður í støðum. Hitin sunnudagin 6 til 10 stig.

Gott vikuskifti.