Føroyar fara at liggja í landsynning úr miðjuni á hesum lágtrýstum, og tí fer ættin her hjá okkum fyri tað mesta at liggja um útsynning.

Lágtrýstini fara at draga kalda luft í Norðurkanada til sín og sleingja hana víðari ímóti okkum, og tí fer aftur at kølna eitt sindur, og vit fara at hava løtur við kava.

Mánadag:

8 til 13 m/s av útsynningi, smáskýggjað við sólglottum og yvirhøvur turt. Um kvøldið fer ættin niður í sunnan, og vindurin veksur upp í 10 til 15 m/s, tað dregur á luftina og fer at regna. Týsnáttina støkkur hann vesturum til vestan, gerst klárari og slítur í. Vindurin minkar niður í 8 til 13 m/s. Hitin millum 5 og 8 stig, men um náttina niður ímóti frostmarkinum.  

Týsdag:

Um morgunin 8 til 13 m/s av útsynningi, smáskýggjað ella klárt og yvirhøvur turt. Út á fyrrapartin dregur á luftina, og vit fáa ælaveður – at byrja við bert við regni, men sum frá líður eisini við vátakava og kava. Mikunáttina veksandi vindur upp í 13 til 18 m/s av suðuri, skýggjað og regn. Hitin millum 2 og 5 stig, men um náttina niður í frostmarkið.

Mikudagin:

Um morgunin og nakað út á seinnapartin 10 til 15 m/s av suðuri, samdrigið og regn. Seint seinnapartin støkkur hann vesturum til útsynning ella vestan, vindurin minkar niður í 3 til 8 m/s, tað gerst klárari og slítur í – tó ælaveður í støðum við regn ella vátakava ella kava. Hitin millum 3 og 8 stig.

Hósdagin:

Allan dagin lítið lot av ymsum ættum, minni enn 5 m/s, skiftandi skýloft og bert okkurt ælið. Hitin millum 2 og 7 stig.

Fríggjadagin:

Lítið lot vestan, minni enn 5 m/s, skiftandi skýloft og okkurt ælið. Um kvøldið veksandi upp í 3 til 8 m/s, skýggjað og ælaveður við regni ella kava. Hitin 2 til 7 stig.