– “Alt eksistensgrundarlagið hjá okkum í bólki 5 og 4 (ikki 4T, men útróðrarbólkin), er toskur og hýsa. Nú verður økið friðað frá 1. februar til 1. mai, og tað ger, at vit verða skerdir umleið 18% til 20%. Samstundis hava snellumenn frítt at fara. Tá tú nú velur at friða “kassarnar” so ógvisliga, sum tú gert, hví verða teir so ikki friðaðir ordiligt, t.v.s. fyri snellu eisini?”, spyr hann.

Av tí sama fara frítíðarfiskararnir avstað við toskinum, meðan útróðrarmenn onki fáa hetta tíðarskeiðið. Ein góðan dag kunnu teir fáa millum 5.000 og heilt upp til 8.000 pund av toski. Hóast friðarmyndugleikin hevur sagt, at økið verður friðað, so fiskurin kann fáa frið at gýta, so hevur hann kortini valt at givið grønt ljós til, at øll hesi túsundtals pundini kunnu verða fiskað um dagin.  

Andru heldur ikki, at tað, sum myndugleikarnir hava valt at gera, gevur meining. Myndugleikarnir hava avgjørt, at tað skal vera frítt at fiska hjá snellubátum, sum bara hava tað til frítíðarvirksemi, meðan at forboð verður sett fyri, at teir, sum liva av tí, kunnu fiska á somu leið.

Heldur ikki Eydna í Homrum frá Havstovuni dugdi at síggja rationalið handan avgerðina hjá myndugleikunum. Hon skilir ikki, hví snellumenn sleppa at fiska, men ikki línumenn. Tí tá tað snýr seg um at verja toskin, so átti tað at verið líkamikið, um toskurin verður fiskaður við snellu ella við línu. Í staðin fyri veiðihátt átti tað avgerandi heldur at verið trýstið, helt hon.

Alt fiskivinnutingið kann síggjast á https://www.youtube.com/watch?v=oJw1AL_qa2U&t=1s .