Eitt hátrýst nærkast Føroyum vestaneftir týsdagin, og tá ið miðjan av rygginum er farin eysturum, fer ættin niður í útsynning. Lýggjari luft fer at reka ímóti Føroyum.

Saman við lýggjari luft fara brúgvaløg við regni at leggja leiðina framvið. Ikki alla tíðina, men serliga mikudagin og fríggjadagin.

Hitalagið fer sum frá líður at kvinka seg nøkur stig uppeftir.

Veðrið í vikuni – dag fyri dag:

Mánadagin:

Allan dagin 5 til 10 m/s norðan, skýggjað og regn í støðum ella ælaveður. Um náttina klárari og yvirhøvur turt. Hitin 4 til 9 stig.

Týsdagin:

Ættin fer at snara úr norði, 5 til 10 m/s, niður í útsynning, meðan vindurin minkar eitt sindur, niður í 3 til 8 m/s. Klárt um morgunin, men sum frálíður skýggjað – tó yvirhøvur turt allan dagin. Um náttina fer hann at liggja millum útsynning og sunnan við einum sindri av meira vindi, 8 til 13 m/s, og fram ímóti morgni fer at regna. Hitin fer at liggja millum 6 og 11 stig.

Mikudagin:

8 til 13 m/s av útsynningi. Skýggjað um morgunin og fyrrapartin og regn. Tað regnar, til nakað er liðið út á seinnapartin. Um kvøldið slítur í, tó okkurt ælið. Um náttina fer ættin upp í vestan, og vindurin minkar niður í 5 til 10 m/s. Enn skýggjað og yvirhøvur turt. Hitin 6 til 10 stig.

Hósdagin:

Fer at liggja av vestri, 5 til 10 m/s, smáskýggjað og sólglottar. Um náttina sunnan, og vindurin minkar niður í 2 til 7 m/s. Loftið verður skýggjað, og hitin fer at liggja millum 6 og 10 stig.

Fríggjadagin:

Hann fer at liggja um sunnan ella eitt sindur vestan fyri sunnan. Ikki nógvur vindur, 2 til 7 m/s. Út á dagin meiri vindur, veksandi upp í 5 til 10 m/s. Skýggjað loft allan dagin og regn ella ælaveður. Um náttina slítur í. Hitin fer at liggja millum 8 og 12 stig.