Norðlýsið eftirfarandi um makrelin – bíða eftir sildini
Norðlýsið fekk nógv at hoyra fyri, at blaðið skrivaði 29. mai, at strandalandasáttmáli var undirskrivaður. Og tað rætta hevði verið at skrivað, at avgerðin var tikin tá. Men nú kann staðfestast, at tølini fyri makrel vóru røtt. Nøgdin av makreli í okkara lut minkaði sera nógv, niður í tey 89.000 tonsini, sum Norðlýsið skrivaði.
Í semjuni, sum nú er undirskrivað, stendur, at fundir vóru í Keypmannahavn í apríl og mai 2024, ið so merkir, at samráðingarfundir ikki hava verið nú í juni. Norðlýsið skrivaði ultimo mai, at úrslitið av samráðingunum bleiv 89.000 tons av makreli í okkara lut, og talið vísti seg at vera 88.800 tons. Ella “umleið 90.000 tons”, sum Kringvarpið nevnir.
At blaðið kom tíðliga út við søguni var ikki minst fyri at bera tíðindini, áðrenn spinndoktarar og/ella politikarar høvdu pyntað uppá tey, sum teir nú hava gjørt við at siga, at hóast kvotan er nógv minni, so er avtalan góð allíkavæl, tí tað verður skjótari at fiska o.a.
Atfinnararnir hava tó rætt í, at vit ikki skuldu havt skrivað, at avtalan var undirskrivað tá. Heldur skuldi tað verið orðað øðrvísi, t.d. at avgerðin var tikin tá. Men tølunum feiltu onki; nøgdin minkaði sum skrivað nógv, niður til tað talið, sum Norðlýsið upplýsti.
Enn hava vit ikki frætt endaliga um sildina. Har skrivaði Norðlýsið 29. mai, at talan fer at vera um 39.000 tons av sild. Nú fáa vit so at síggja, um undirskrivaða semjan ikki eisini man siga tað.