Soleiðis fer veðrið ikki at vera í vikuni, sum stendur fyri framman. Í morgin fer eitt lágtrýstøki at menna seg eystanfyri og í Norðsjónum, og tað fer at hava við sær, at køld luft fer at reka ímóti okkum. Fleiri dagar fer lotið at vera heilt frískt við vetrarligum avfalli. Kanska fer tað at vera hvítt í erva í teim hægstu fjøllunum norðanfyri í miðvikuni og dagarnar aftaná.  

Veðrið í vikuni – dag fyri dag:

Mánadagin:

Fyrrapartin 3 til 8 m/s vestan, smáskýggjað og okkurt ælið. Seinnapartin samdrigið og ælaveður ella regn. Sum frálíður fer ættin upp í norðan, og um kvøldið slítur í. Hitin 6 til 11 stig.

Týsdagin:

Um náttina 5 til 10 m/s norðan, skiftandi skýloft og kanska okkurt ælið, men um morgunin 3 til 8 m/s av útnyrðingi, skiftandi skýloft og ælaveður, í støðum erva eisini kanska vátakavi. Hitin 5 til 9 stig.  

Mikudagin:

Um náttin 8 til 13 m/s norðan, skýggjað og ælaveður. Um morgunin veksur vindurin upp í 10 til 15 m/s, og tað verður veðrið restina av degnum: skýggjað og ælaveður, kanska hvítt í erva har fjøllini eru høg. Hitin 4 til 9 stig.

Hósdagin:

10 til 15 m/s norðan, sum fram ímóti morgni fer í útnyrðing, skýggjað og ælaveður, kanska eisini við vátakava í erva. Um kvøldið gongur hann niður ímóti vestri, skýloftið skiftandi og yvirhøvur turt. Hitin 4 til 8 stig.

Fríggjadagin:

Um náttina minkandi vindur úr 10 til 15 m/s niður í 3 til 8 m/s vestaneftir. Skýloftið skiftandi og yvirhøvur turt. Um seinnapartin fer ættin at lækka, og um kvøldið er hon komin niður í sunnan, og vindferðin minkað niður í eitt lítið lot, 5 m/s ella minni. Hitin um náttina og morgunin 4-6 stig, men tá ið hann er lækkaður, fer hitalagið uppaftur í 10-12 stig.