Dennis Holm hevði ikki lógarheimild
Eftir drúgva viðgerð er Landsstýrismálanevndin, við advokathjálp, komin fram til, at tað ikki var í lagi, tá ið Dennis Holm í 2024 útlutaði fiskirættindi við kunngerðarbroyting. Árni Skaale, løgtingsmaður fyri Fólkaflokkin, kærdi, og hann hevur nú fingið viðhald í kæruni.
Í stuttari viðmerking til Kringvarpið sigur Hans Jacob Thomsen, formaður í Landsstýrismálanevndini, at Dennis Holm var ósamdur í fyribilsniðurstøðuni, men at nevndin kortini ikki helt orsøk vera til at broyta hana, og nú er hon so vorðin endalig.
Hans Jacob Thomsen sigur eisini, at hann kann ikki spáa um, hvat nú fer at henda, men sigur, at málið nú er avgreitt frá Landsstýrismálanevndini av. Til spurningin um møguligt misálit, sum tað helst kann roknast við, tá avgerðir uttan lógarheimild verða tiknar, sigur Hans Jacob Thomsen, at misálitisuppskot vanliga koma frá andstøðuni.
Líkt er tí til, at bólturin nú liggur hjá Árna Skaale, sum kærdi, og Fólkaflokkinum, sum hann er tingmaður fyri. Bárður á Steig Nielsen, formaður í Sambandsflokkinum, er limur í Landsstýrismálanevndini og tískil við í niðurstøðuni um, at lógarheimild ikki fyrilá.