Í dag var seinasti undirvísingardagurin á Føroya Húsarhaldsskúla í hølunum á Stoksoyravegi 29. Tá vit vitjaðu riggaðu tær av og tað var við blandaðum kenslum, at tær gjørdu seg klárar at siga gomlu hølunum farvæl. 

Hálvan august byrjar undirvísingin aftur hjá Húsarhaldsskúlanum og tá verður tað heimi í miðbýnum á adressuni við Sandin 4 í spildurnýggjum og stásiligum kørmum. 

Vit fara frá 21 næmingum upp til 35 næmingar. Tað er langur bíðilisti, sigur Jóhanna. 

Jórun og Simona takka nú fyri seg sum náttarvaktir og fíngu í hesum sambandi blómutyssi fyri gott arbeiði í mong ár

Skulu hava nýtt navn

Seinastu tíðina hevur verið møguligt at senda inn uppskot til nýtt navn fyri skúlan.

Hetta er ein nýggj byrjan og ein staðfesting av, at navnið kanska ikki er so tíðarhóskandi longur, sigur Jóhanna.

Vit hava fingið hópin av uppskotum og fara at kunngera vinnaran í samband við, at bygningurin alment verður tikin í nýtslu í september, upplýsir Jóhanna á Tjaldrafløtti.