Tað verður 52 ára gamli Panagiotis Messinis úr Grikkalandi, sum skal venja besta liðið hjá Team Klaksvík í 2025/26. Tað boðar Team Klaksvík frá í dag. Talan er um venjara, sum síðandi 2023 hevur verið hjálparvenjari hjá besta mansliðnum hjá Olympiakos úr Grikkalandi, sum vann meistaraheitið farna kappingarár.

Frá 2019 til 2022 var hann venjari hjá kvinnulandsliðnum hjá Grikkalandi. Sum spælari leikti hann 85 landsdystir fyri Grikkaland.

Umframt at venja besta liðið, so kemur hann eisini at hava ein stóran venjaraleiklut fyri alt felagið við tí endamáli, at allur ungdómurin kemur at fáa venjingar á høgum stigi. Fyri nøkrum vikum síðani gjørdi Team Klaksvík sáttmála við málverjan Mladen Mjerimacka, ið verður málverji og málverju mennari í felagnum. Hann hevur júst verið málverjuvenjari hjá U21-landsliðnum, sum vann bronsu í HM-endaspælinum.