Í 70 ár hevur Cirkus Arena verið millum fremstu sirkus í norðanlondum. Tey hava í fleiri umførum vitjað í Føroyum, og nú koma tey aftur við eini ógloymandi føðingardagsframførslu fyri alla familjuna.

Saman við Bubber og Malene verður møguligt at uppliva tað besta, sum sirkusheimurin hevur at bjóða. Talan verður um viðurslønt heimsnøvn, sum fara at framføra við Tjarnir.

Ársins sirkusframførsla

Tey, sum leita sær niðan í stórhøllina við Tjarnir, verða vitni til eina hugtakandi framførslu. Møguleiki verður at síggja og uppliva línudans, jonglørar, hugtakandi luftakrobatik og ikki at gloyma framúrskarandi klovnarnar. Alt hetta kryddað við tónleiki av besta slagi. Til samans eiga tey framførandi heili 40 heimsmet. Hetta verður løtan, sum øll fara at tosa um.

Talan er um tveir tímar við besta hugsandi undirhaldi. Ein ógloymandi løta, sum savnar alla familjuna til eina stuttliga og lívsjáttandi uppliving. 

Gleð teg til Sirkus Arena við Tjarnir

- Vit eru sera fegin um at kunna bjóða Cirkus Arena vælkomið aftur til Føroya. Hetta verður ein heilt serlig uppliving, og vit gleða okkum at bjóða føroyingum í øllum aldri til framførsluna við Tjarnir, sum verður leygardagin 6. september, sigur Regin W. Dalsgaard, stjóri við Tjarnir.

Atgongumerkjasølan til Cirkus Arena byrjar mikudagin 23. juli kl. 12 á www.tjarnir.fo.