Mjølnir 3 - 0 Ternan. Settúrslit: 25/20, 25/10, 25/12

Mjølnir vóru favorittar at vinna dystin og tann leiklutin svíktu teir ikki. Talan gjørdist um ein sannførandi 3-0 sigur.

Hesaferð hevði venjarin Bárður Bendix Mikkelsen valt at geva ungu leikarunum á Mjølnir liðnum nógva spælitíð og teir smæddust ikki burtur. Hópurin telur 12 mans og tá einans 6 sleppa á vøllin í senn, so er tað ein kunstur hjá venjaranum, at halda øllum leikrunum til. 

Brøðurnir Josiah og Micah Lukama, sum leika ávíkavist miðja og hevari, royndust væl. Micah hevur ta torføru uppgávu, at hann skal taka arvin upp eftir livandi Mjølnir legenduna Thorvald Danielsen, tá hann einaferð gevst.

Ólavur Johannesen fekk eisini fitt av spælitíð og tað hevur hann brúk fyri. Ólavur var kosin ársins ungi leikari fyri nøkrum árum síðan, men skaði hevur síðani darva hansara menning. Ólavur er eitt sera gott kort hjá Bárður at hava í ermuni. 

Síðani var tað gott eisini at síggja rutineraða Páll Heðin í Grund, blokka og sláa bóltarnar niður á miðjuni. Páll var burturfrá í fjør, men hevur tikið flogbóltsskógvarnar á aftur í ár. 

Stigatalva í Polestar deildini. Mynd fbf.fo