Bæði tiltøkini byrja kl. 19:30.

Bókin er eitt úrslit av samstarvi og samrøðum millum høvundan og Toda, har Todi rør afturá eina yrkisleið í fótbólti, sum byrjaði í 1989 í KÍ og endaði aftur í KÍ í 2009. Umframt KÍ spældi Todi í hesum 20-ára tíðarskeiðinum eisini í B36, Lyngby, FC København, Start og nakrar dystir í Fremad Amager.

Í føroyskum høpi hevur Todi havt eina framúrskarandi yrkisleið við fleiri meistaraheitum og steypasigrum í skjáttuni. Nógvu sigrarnir eru sjálvandi viðgjørdir í bókini, men endamálið er fyrst og fremst at fara afturum sigrarnar og niðurløgini og greiða frá tí, sum fer fram, har almenningurin ikki hevur atgongd.

Hvussu tað var at vera ungur í Klaksvík, tá kreppan fór at gera um seg í níti-árunum. Hvussu tað var at skifta til B36 í 1993, tá tað var óvanligt at skifta feløg í Føroyum. Hvussu tað var at fara niður til Danmarkar av sínum eintingum, og hvat tað kravdi av einum at hevja seg í einum náðileysum umhvørvi, sum bara virðismetir sigrar. Nógvu skaðarnir, steðgurin á landsliðnum og so framvegis. Tað mesta er vent, snarað og sagt frá í bókini.

Á framløgunum leggur høvundurin út við at siga frá bókini. Eftirfylgjandi er eitt prát við Toda og Sólvit, har Leivur Frederiksen setir spurningar.

Hans Andrias framførir á tiltakinum í Klaksvík og Erla Bech Nolsø í Havn.