Í meira enn fjøruti ár hevur Sunleiv Højgaard staðið í fremstu røð í Skálafjarðar Kommunala Sløkkiliði – sum sløkkiliðsmaður, leiðari og fyrimynd.

At Sunnleiv fekk handað fyrsta heiðursteknið fyri tænastu í tilbúgvingini, er bæði eitt persónligt heiðursmerki og ein viðurkenning av øllum teimum, sum dagliga gera hetta týdningarmikla arbeiðið kring landið.

Við hesum tekni vildi myndugleikin vísa takksemi – ikki bara fyri áralangt trúfast arbeiði, men fyri eitt haldført íkast til sjálvan grundvøllin undir okkara felags trygd og samanhaldi innan økið.

Leygarkvøldið 3. januar 2026 skipaði Skálafjarðar Kommunala Sløkkilið fyri árliga hugnakvøldinum í Bygdarhúsinum á Strondum.

Tað var í hesum sambandi, at Súni í Hjøllum, formaður í tilbúgvingarnevndini hjá SKS, vegna nevndina, hjartaliga takkaði Sunleivi Højgaard fyri góða, trúgva og drúgva tænastu í hesum týdningarmikla arbeiði til frama fyri trygd og samanhaldi í Skálafjarðar Kommunala Sløkkiliði.

Sum tøkk fekk Sunleiv Højgaard ein málning, sum Jón Magnus Joensen, hevur málað.

Eisini fingu sjey aðrir sløkkiliðsmenn í SKS silvurheiðurstekin og skjal, har Eirikur í Jákupsstovu, núverandi landsstýrismaður, skrivar: ”Sum landsstýrismaður fegnist eg um, at tú ósjálvsøkin og trúfastur hevur tænt føroysku tilbúgvingini”.

Teir, sum fingu silvurheiðurstekin vóru:

• Jan Abrahamsen, Strendur, starvast í 39 ár.
• Hanus Heinesen, Nes, starvast í 36 ár.
• Niclas Davidsen, Toftir, starvast í 36 ár.
• Harry Benjaminsen, Toftir, starvast í 32 ár.
• Fróði Danielsen, Toftir, starvast í 30 ár
• Vilhelm M. Olsen, Skála, starvast í 30 ár
• Jónsvein Bjartason, Strendur, starvast í 26 ár

Tveir sløkkiliðsmenn, sum fyri stuttum eru givnir, vórðu eisini heiðraðir fyri trúgva tænastu og fingu málning, sum Jørgin Olsen hevur málað.

 Teir eru:

• Leif Petersen, Oyndarfjørður og
• Andrias Hammer, Funningsfjørður

Skálafjarðar Kommunala Sløkkilið varð stovnað fyri meira enn 51 árum síðan, tann 4. september 1974. Samstarvið umfatar Nes- Sjóvar- og Runavíkar kommunur. Samstarvið hevur verið gott í øll hesi ár við sera góðum og trúgvum sløkkiliðsfólkum – tey seinastu mongu árini við Sunleivi Højgaard sum tilbúgvingarleiðara og Vilhelm M. Olsen sum varaleiðara.

Í tilbúgvingarnevndini fyri Skálafjarðar Kommunala Sløkkilið eru teir tríggir borgarstjórarnir fastir limir, harafturat hevur Runavíkar kommuna tveir fastar limir. Í nevndini er eisini tilbúgvingarleiðarin og eitt umboð frá fútanum. Eisini møtir varaleiðarin til fundirnar.

Í tilbúgvingarnevndini sita nú:

• Súni í Hjøllum, formaður
• Hans Anders Jacobsen, næstformaður
• Tórbjørn Jacobsen
• Terje B Vestergaard
• Pauli Poulsen
• Sunleiv Højgaard og
• Hans L. Djurhuus