Hetta er stórarbeiði, tí hvør lítil steinur skal takast varðisliga av, eftir ávísum leisti.

Av tí vektin er so nógv, verður ein partur av niðaru síðu og so av ovari síðu tikin niður uppá skift. Tað verður arbeitt í modulum ella sektiónum, sum eru millum berandi høvuðskonstruktíonirnar í tekini – ein í senn.

Tá ið takið tikið av, verður á sperruna fest ein hjálpisperra, sum er meir enn 20 cm og so bjálving løgd í her. Síðani verður undirtak lagt við dúki á, og omaná tað verða teir nýggju skifersteinarnir lagdir.

Bara at fáa stillasuna upp at standa, er stórarbeiði. Nú verður so ein “takkonstruktión” løgd omaná verandi kirkjutak sum partur av stillasuni.

Stillasukonstuktiónin verður um 2 m omanfyri mønuna á kirkjuni. Báðumegin mønuna verður ein leypikattur, so til ber at lyfta og flyta byggitilfar av takinum og á aftur.

Síðani skal dúkur festast á alla stillasuna – um alla kirkjuna. So er at fara til verka, og tað skal helst ganga skjótt, so ikki verður komið ov langt inn í veturin og stormarnar, áðrenn liðugt verður.

Eftir bókini, skal verkætlanin, sum kostar góðar kr. 20 mill standa liðug 26. oktober 2026, men ongantíð betur, um tað varð áðrenn tað.

Tað er ArtiCon, sum stendur fyri arbeiðnum.

Henda vakra og rúmliga kirkjan frá 1963, ið Fríðrikur kongur 9. vígdi, stendur nú fyri eini spennandi og serstakari umvæling, sum ikki er so vanlig í Føroyum.