Ilt er at spáa hvat tú fært burturúr eini søluframsýning, men skal farast eftir áhuganum, so sær væl út fyri fiskasuppuni norðan úr Sundi.
Norðfra í Hvannasundi er eitt av føroysku flakavirkjunum, ið eisini hevur lagt seg eftir heimamarknaðinum og sum hevur nógv ymisk produktir beinleiðis til brúkaran.
Á Fish Fair ídag, var so høvi at royna fiskasuppuna. Vit skulu seinni greiða nærri frá hesi sermerktu suppu, og skulu í hesum sambandi bert siga, at hon brýtur av øðrum slíkum frammanundangjørdum fiskasuppum, við tað at her fært tú sera leskilig fiskapetti og annaðgott sum bót í suppuni.
Vit royndu at fylgja við, hvussu gekst suppuni tá fólk tóku sær ein tallerk, og hóast tað vanliga er við slíkar smakkiroyndir at fólk fáa sær einar tvær ferðir upp í munnin, so var øðrvísi við fiskasuppuni hjá Norðfra. Allir tallerkar, sum vit sóu fólk fáa sær vórðu tømdir á botn og harafturat vóru tað fleiri ið fingu sær ein tallerk afturat ella tríggjar, eins og vit á Norðlýsinum gjørdu.
