Í gjár skrivaðu vit um ein fløskupost, sum varð kastaður út á Sjómannadegnum í 2013 og sum ein ferðamaður fann í Íslandi í summar.
Vit hava nú funnið fram til, at tann sum tveitti fløskupostin var tann tá 10 ára gamla Elin Andreasen úr Havn.
“Eg var í Klaksvík og vitjaði ommu og abba,” sigur Elin við Norðlýsið.
“Tað var Sjómannadagur og vit fóru í vatnkríggj. Eg, mamma og systrarnar, systkinabørnini, mostur mín og maður hennara vóru øll umborð á Klakki,” sigur hon.
Á hesum túrinum vórðu fløskupostar tveittur í havið.
“Eg haldi ikki, at eg nakrantíð hevði roynt at sent fløskupost, og eg roknaði heldur ikki við, at hann nakrantíð fór at verða funnin aftur,” sigur Elin.
Men í gjár kundi mamma hennara siga henni, at hon hevði lisið í Norðlýsinum um fløskupostin.
Spurd hvat hon hugsaði, tá hon frætti tað, sigur Elin:
“Eg visti ikki ordiliga um tað passaði.”
Norðlýsið fær ofta boð um fløskupostar sum eru tveittir út á Sjómannadegnum og sum eru funnir bæði í Føroyum og í grannalondunum.
