Fyrr í vikuni var fyrsta atmosferiska bumban yvir Norðuratlantshavi. Djúpa lágtrýstið gjørdi um seg í Grønlandsfjørðinum og á havleiðini sunnan fyri Ísland. Ringasta veðrið var fyrrakvøldið, hvassur stormur í miðalvindi.
Nú er tann næsta á veg, skrivar Veðurstova Føroya á heimasíðuni. Lágtrýstið fer ikki at raka okkum nakað serligt, men heldur í Íslandi og á havleiðini sunnan fyri Ísland, líka sum fyrr í vikuni.
Meðan lágtrýstið liggur yvir Íslandi og spakuliga grynnist og viknar, tók eitt nýtt lágtrýst seg upp yvir havinum 200 fjórðingar í landsynning úr Nova Scotia. Tað fer at ganga eystureftir, til tað fyrrapartin mánadagin er komið til Asorurnar. Tá er trýstið lækkað niður í 999 hPa. Enn er ikki nakað serligt av vindi ella regni rundan um tað.
Komið eystur til Asornurar, er tað undir jettstreymunum, sum eru beint omanfyri í 5/6000 metra hædd. Teir ganga við nógvari ferð í landnyrðing og norðan, og taka lágtrýstið við sær og sýgur luftina úr tí.
Frá seinnapartinum mánadagin dýpist tað úr 997 hPa skjótari og skjótari, meðan tað gongur ímóti vesturstrondini í Írlandi og haðani ímóti Íslandi. Skjótasta dýpingin er týsdagin, tá ið trýstið í miðjuni fer úr 989 hPa niður í 954 hPa – hetta er 35 hPa í 24 tímar! Tað er sera nógv. Onnur atmosferiska bumban í eina viku beint eftir heystjavndøgur.
Hósdagin klokkan 4 um morgunin sær veðurkortið soleiðis út á havleiðunum sunnan fyri Ísland. Hetta er løtan við mest vindinum í Føroyum. Lágtrýstið er minni enn 100 fjórðingar sunnan fyri Ísland, lufttrýstið í miðjuni er 968 hPa, mesti vindurin er sunnan fyri miðjuna. Vit sleppa aftur nokkso væl. Mynd: windy.com
Leiðin, lágtrýstið gongur, er næstan tann sama sum fyrra bumban farna mána- og týsdag. Mesti vindur og regn í Føroyum fer at vera mikudagin, hvassur vindur upp í skrið millum sunnan og landsynning, samdrigið og regn.
Tað fyrsta djúpa lágtrýstið í heyst kom ikki nær okkum, og sum forsagnirnar eru í dag, so fer tað næsta djúpa lágtrýstið heldur ikki gera stórvegis um seg í Føroyum.
Heystið er júst byrjað, og veturin stendur fyri durum. Nógv kann enn henda.
Haldari 
