Jógvan Skorheim, borgarstjóri, og stýrisformaður í Norðoya Bú- og Heimatænastu, hevur í samráð við leiðslurnar valt at seta nýggj tiltøk í verk, ið eru umfatandi, men sum vera mett neyðug, soleiðis at trygdin er í hásæti.
Klaksvíkar kommuna hevur í dag umrøtt sín leiklut, um hvussu kommunan best kann fyribyrgja og avmarkað smittuvandan av Covid19.
Tiltøkini verða sett í verk og eru galdandi frá fríggjadegnum 13. mars til sunnudagin 29. mars.
Øll starvsfólk hjá Klaksvíkar kommunu verða send heim at arbeiða
Við nøkrum einstøkum undantøkum arbeiða starvsfólk ikki á sínum vanliga arbeiðsstaði. Dentur verður lagdur á, at hetta ikki er frítøka fyri arbeiði, men at arbeiðsstaðurin verður fluttur heim í tann mun tað er møguligt.
Uttanlandsferðir, skeiðsvirksemi og fundir skulu avlýsast
Øll starvsfólk, ið eftir ætlan skulu uttanlands vegna kommununa, verða biðin um at avlýsa ferðina.
Eisini verður heitt á starvsfólk um at avlýsa alt skeiðsvirksemi og fundir.
Fólk, ið hava verið uttanlands, skulu ikki koma til arbeiðis
Starvsfólk, sum hava verið uttanlands hesa seinastu vikuna, verða biðin um ikki at koma til arbeiðis komandi 14 dagarnar.
Dagstovnar stongja
Dagstovnaøkið, Húsið, barnatannrøktin og frítíðarskúlin hjá Klaksvíkar kommunu stongja virksemið. Um tørvur er á at gera brúk av hesum tilboðum, skulu foreldur/verjar venda sær til viðkomandi leiðara. Heitt verður á foreldur/verjar um einans at gera brúk av hesum møguleika, um ongin onnur loysn er.
Býarbussar og serflutningur steðga allari koyring
Klaksvíkar Svimjihøll, ítróttarhallirnar, Klaksvíkar bókasavn, Kvøldskúlin og Tónlistaskúlin lata aftur
Býráðsfundur og nevndarfundir í mars verða avlýstir
Búplássini á eldraøkinum stongja fyri vitjandi
Fyri at verja okkara eldru borgarar á eldraøkinum verður stongt fyri vitjandi á øllum bústovnum hjá Norðoya Bú- og Heimatænastu. Í átrokandi førum kunnu avvarðandi venda sær til viðkomandi leiðara, har onnur avtala kann verða gjørd.
Umlætting
Norðoya Bú- og Heimatænasta tekur ikki nýggjar borgarar til umlætting.
Telefonavgreiðsla hjá Norðoya Bú- og Heimatænastu
Telefon nr. 793400 hjá Norðoya Bú- og Heimatænastu svarar yrkadagar frá kl. 8.00 – 15.00.
Miðlan letur aftur
Avgreiðslan í Klaksvíkar kommunu er skerd, og tí letur avgreiðslan í Miðlan aftur. Tó svarar telefonin 410000 yrkadagar frá kl. 10.00 til 15.00.
Kjatt-linja í boðklivanum á facebook
Starvsfólk hjá Klaksvíkar kommunu og Norðoya Bú- og Heimatænastu og allir borgarar í kommununi fáa møguleika at seta spurningar, sum viðvíkja átøkum hjá Klaksvíkar kommunu í samband við Covid19. Hesir spurningar kunnu setast í boðklivanum hjá Klaksvíkar kommunu á facebook, og verða svaraðir eftir besta førimuni.
Á heimasíðuni www.klaksvik.fo ber eisini til at kunna seg um viðurskifti í Klaksvíkar kommunu í samband við Covid19.
