Ofta er ringt at fáa fulla vissu fyri nær, og í hvørjum sambandi gamlar myndir eru tiknar, men henda myndin kundi stava frá 75 ára føðingardegnum hjá Jens Klæmint Isaksen tann 11. mars í 1956.
Jens Klæmint var kendur av hvørjum mansbarni í Klaksvík fyri árum síðan bæði sum keypmaður, reiðari og ikki minst frá sínum stóra arbeiði í Brøðrasamkomuni. Hann var føddur á Kirkju í Fugloy í 1881, og giftist við Sáru f. Fuglø av Viðareiði í 1904. Tey búðu fyrst á Viðareiði, til tey í 1916 fluttu til Klaksvíkar at búgva.
Fólkini í fremru røð á myndini eru f.v.: Conrad Joensen, Agnar á Dul, Jógvan við Keldu, Gigga við Keldu og Oddmar Marsteen. Kvinnurnar aftanfyri eru f.v.: Thala á Dul og Hjørdis Hansen f. Vitalis. Okkurt navn má takast við fyrivarni.
Ein mynd hjá eldra Jóhan Purkhús.
