KÍ hevur heimavøll og kemur víðari við byrjunarúrslitinum 0-0, men ivasamt er, hvørs heimavøllurin er nakar fyrimunur.
Í altjóða fótbólti hava vit sæð nógv dømir um, at tað er ikki avgerandi at hava betri úrslit í fyrra dystinum av tveimum. Í Champions League er tað í ár ofta liðið, ið hevur verri útgangsstøðið til seinna dystin, sum er komið víðari. Hesaferð hava HB og KÍ spælt 1-1 javnleik í Tórshavn, so KÍ hevur betri útgangsstøðið, tí KÍ klárar seg við 0-0. Men tað er ikki vist, at hetta er nakar fyrimunur.
Púra javnt í Klaksvík
Hyggja vit eftir úrslitunum síðstu árini, so stendur HB seg eins væl sum KÍ, tá liðini spæla í Klaksvík. Síðani Mikkjal K. Thomassen bleiv venjari hjá KÍ í 2015 hava liðini spælt sjey dystir móti hvørjum øðrum í Klaksvík. Bæði liðini hava vunnið tríggjar dystir í part, meðan tann eini er endaður við javnleiki.
2018: KÍ-HB 0-1
2018: KÍ-HB 1-2
2017: KÍ-HB 0-0
2017: KÍ-HB 1-0
2016: KÍ-HB 1-0
2015: KÍ-HB 1-0
2015: KÍ-HB 0-2
Dystir: 7
KÍ vunnið: 3
Javnleikur: 1
HB vunnið: 3
Hálvfinalan millum KÍ og HB byrjar mikukvøldið kl. 18.00, og dómari verður Petur Reinert.
