Veðrið hevur ikki verið heilt so ringt í nátt og í morgun, sum spátt varð her á portalinum hjá Norðlýsinum í gjár og fyrradagin.
Tíbetur…
Tá ið lágtrýst raka beint á Føroyar, skal bert lítil broyting til, at forsøgnirnar ikki halda. Lágtrýstið, sum hevur staðið fyri veðrinum í gjár, í nátt og í morgun – og restina av hesum sunnudegi – hevur ikki uppført seg, sum veðurfrøðingar væntaðu.
Í staðin fyri at fara eystur um Føroyar nakað sunnanfyri – ella beint sunnanfyri – er tað í tvíningar. Onnur helvtin fór eysturum sum væntað, meðan hin helvtin enn er stødd vestan fyri Føroyar. Hon fer suðureftir ímóti Írlandi. Har verður væntandi ringt veður í kvøld.
Men heilt einki var tó ikki av vindi ella avfalli í gjárkvøldið ella í nátt. Og enn er vindur í morgun.
Tað hevur verið heilt fitt av vátakava í nátt og regni í morgun. Vindurin, sum máldur er kring landið hevur verið í miðal eini 5 m/s minni enn spátt varð.
