Fyri at sleppa undan fleiri misskiljingum í sambandi við samanberingarnar av linjuføring 1 úr Djúpadali til Sandvíkar og linjuføring 2 úr Traðardali til Sandvíkar, verður hetta kunningarskriv sent út.
Linjuføringin úr Traðardali til Sandvíkar er væl longri, og tað viðførir, at tað má borast úr Skúvoy eisini. Metingarnar siga, at tað kostar 700-1.000 mió.kr. meira enn ein tunnil úr Djúpadali.
Møguleiki er at spara uppá havn og byggipláss í Skúvoy, men við tí økist váðin í verkætlanini, og tað kann ikki viðmælast í eini so stórari verkætlan.
Við vegagerðini á Sandi vil ferðslutrygdina gerast betri, og verkætlanin kemur ikki at ávirka veltuna, tí vegurin eftir Sandarfløtti verður varðveittur, sum hann er.
