(Budapest) Atli Gregersen spælir heilt vist ikki, meðan stórt ivamál er um Fróða Benjaminsen. Men Lars Olsen hevur ikki tikið avgerð um, hvør skal vera liðskipari, um Fróði ikki verður við.
A-landsliðið vandi í Budapest í morgun. Og Lars Olsen hevur nógv at hugsa um áðrenn dystin móti Rumenia sunnudagin á Tórsvølli. Atli Gregersen hevur leikbann og fleiri leikarar stríðast við skaðar umframt, at dysturin í gjár helst kravdi sera nógv av leikarunum, og so er spurningurin, hvør hevur orku eftir til dyst trý døgn seinni.
Lars Olsen segði við Norðlýsið í morgun, at tað er ivamál um fleiri leikarar og at Brandur Olsen, Hallur Hansson og Christian L. Holst helst byrja inni. Síðani vóru ov nógv ivamál til at kunna siga nakað meir um skaðastøðuna. Mongu ivamálini gjørdu eisini, at hann kundi ikki seta navn á ein liðskipara, um Fróði Benjaminsen ikki vísir seg at blíva klárur.
