Magne Hoseth, høvuðsvenjari hjá KÍ, sigur, at KÍ møtir einum sera góðum liði.
Lutakastið til Champions League hevur verið og KÍ trekti tað besta liðið sambært styrkismetingini av øllum 30 í 1. umfari. Magne Hoseth viðurkennir, at hetta var eitt torført lutakast.
– Hetta var tað torførasta liðið, sum vit kundu fáa. Teir eru hægst styrkismettir og hava nógvart royndir frá altjóða fótbólti. Teir hava onkrar normenn og onkrar sum hava spælt nógv í Norra, sum eru góðir. Men vit mugu taka uppgávuna sum hon kemur og vit hava alt at vinna, sigur Magne Hoseth við Norðlýsið.
Vit spyrja um Ferencvaros er betri enn Bodø/Glimt, sum KÍ møtti í fjør.
– Teir eru helst eitt hakk betri. Men teir eru ikki mitt í kappingarári, meðan Bodø/Glimt spældi mitt í kappingini og tað kann spæla inn, sigur Magne Hoseth.
