Norðingur vann á jóansøku fyrsta sigurin í ár og skapti av álvara spenning í FM-kappingina.
Norðingur fekk betra startin og hevði betra endaspurtin og vann við hálvari bátslongd í einum sera spennandi róðuri. Sostatt er spenningur komin í FM-kappingina, har støðan nú er 2-1 til Klaksvíking eftir tríggjar róðrar. Norðingur hevur havt framgongd allatíðina í nýggja bátinum og tann framgongdin helt fram í dag.
KRF fekk góð úrslit, har Fípan Fagra barnaróður dreingir, Sævarmoy dreingir 14-16 ár, Fípan Fagra dreingir 17-18 ár og Fípan Fagra kvinnur vunnu sínar róðrar. Hjá 8-mannaførum var hetta fyrsta stevnan, har Nevið Reyða ikki vann. Knørrur vann á Nevinum í dag.
