Ein meiriluti av okkara fínastu halda so nógv um Pisshúsið í Klaksvíksgarðinum, at tað skal “varðveitast og setast í nýtiligan stand”
Býráðsumsitingin mælti annars til at taka Pisshúsið í Klaksvíksgarðinum niður, tí tað er í so ringum standi. Kostnaðurin av at taka pisshúsið niður er mettur at verða 25.000 krónur.
Pisshúsið í Klaksvíksgarðinum fyllir nógv hjá býráðslimunum, tí allir býráðslimir tóku orðið í málinum og summir enntá fleiri ferðir.
Orðaskiftið um pisshúsið tók fitt av tíð og tá atkvøðast skuldi, var ein meiriluti fyri at varðveita og seta pisshúsið í stand. Og ikki nokk við tað, tí meirilutin ynskti eisini, at tangagarðurin norðanfyri skal takast burtur, og at økið sunnanfyri pisshúsið verður ruddað og slættað.
Tað kom ikki fram á býráðsfundinum, hvør kostnaður stendst av omanfyrinevndu arbeiðum.
Norðlýsið fylgir málinum.
Býráðssamtykirnar frá fundinum í gjár síggjast her.
