Kunningartiltak verður á Tekniska skúla í Klaksvík í morgin 11. apríl frá klokkan 9:30 til 12:30, har øll eru hjartaliga vælkomin at hoyra um tær mongu og góðu útbúgvingarnar, sum til ber at taka á okkara universiteti í Føroyum.
Básurin stendur uttan fyri miðlasavnið, har lestrarvegleiðarar eru at vegleiða og kunna.
Herfyri var Setrið á Miðnámi á Kambsdali, har elstu næmingarnir fingu høvi at kunna seg um møguleikarnar fyri at taka hægri útbúgving í Føroyum. Fyrrapartin í dag er Setrið saman við Vinnuháskúlanum og Hægri Námi á Glasir, har básar eru við fólki og tilfari til tey ungu. Í morgin stendur so Klaksvík fyri tørni, og seinni í mánaðinum verður eisini farið á Miðnám í Vestmanna og Miðnám í Suðuroy at kunna um lestrarmøguleikarnar.
