60 ára gamli journalisturin, bankamaðurin við fleiri øðrum heitum, Kári Mikkelsen, hevur saman við millum øðrum Líggjasi í Bø, Símun Pauli Konoy, Olivur Thomsen, Jógvan Eliasen og øðrum, savnað saman eitt sera forvitnisligt 40 ára minnisrit um Com-Data.

Felagið, ið kom á vinnulívs himmalhválvið, sum eitt stjørnuskot og sum hvarv líka skjótt, eftir at hava verið í fremstu røð innan tøkniliga framburðin her á landi, á sjógvi og í londunum kring um okkum.

Nú eg havi lisið bókina, kann eg ikki annað enn gleðast um at síggja á prenti, allan tann ótrúliga framburðin, sum Com-Data hevur verið fyri okkara vinnulív.

Spennið hevur verið stórt, frá at byrja sum bókhaldsvirkið til at stýra fiskivinnuni, bæði á landi og á sjónum, er so ótrúligt at tað illa kann sigast frá.

Tað má hava verið sera trupult hjá rithøvundanum, at avmarkað seg  til knappar 200 síður.

Tá eg tí havi lisið bókina og samstundis havi havt tætt samstarv til Com-Data líka síðani fyritøkan kom á “computara” banan, sum vit nevndu telduna tá, so kann eg ikki lata vera við at hugsa aftur á týdningin fyritøkan hevur havt fyri menningina hjá vinnulívinum í Klaksvík.

Bara hjá Norðlýsinum var Com-Data við til stóra kollvelting. Norðlýsið var útgjørt við dýrum reprokamera, setimaskinum, framkallitólum, av handa slag, til myndir, filmir og sats. Her arbeiddu setarar, umbrótarar, reprofólk og fotografar.

Stóra broytingin, sum hendi her á fyritøkuni var, tá John William byrjaði at bróta Norðlýsið um á síni Hewlet Packard teldu frá Com-Data við einum Page-Maker programmi.

Jú vegurin hevur verið spennandi og vit hava verið ígjøgnum nógva ymiska tøkni til vit í dag næstan kunnu gera alt á eini teldu. Á vegnum hevur Com-Data verið ein sera umráðandi veitari hjá okkum.

Sjálvur arbeiddi eg nakrar tímar um dagin í fólkaskúlanum í 70-unum og 80-unum. Millum annað fall tað í mín lut, at taka mær av at undirvísa í “Datalæru” í 9. og 10. flokkunum. Vit fingu ABC80 teldur í vóru 16 ella 32 K til støddar. Tær høvdu ikki megna nógv í dag, nú ikki verður tosað um kilo longur, men um mega, tetra ella tað sum størri er.

Á gomlu myndini, sum er við her, síggjast lærarar á telduskeiði á Ziskatrøð í 1982. Tað var soleiðis, at eg saman við Com-Data og Norðoya Sparikassa fekk eitt skeið upp at standa. Jez Løvendal frá Danisco í Danmark kom upp at undirvísa. Hann segði okkum, at tað ráddi um at læra skúlanæmingarnar at rorrita. Ongi tøk forrit vóru tá í tíðini til teldurnar, uttan kanska at ein tennisbóltur kundi fáast at hoppa aftur og fram á skerminum, alt annað forðaði støddin 16K fyri.

Í dag verður tosað um ótrúligar møguleikar, ið skjótt verða tøkir á netinum. Møguleikar har vit at kalla kunnu vera til staðar alla staðir kring knøttin.

Bókin er væl úr hondum greidd og lýsir væl, at tað ber til hjá okkum her á landi, at gera okkum galdandi innan tøkni, bert vit hava hugflogið og áræðið.