Italia er stóra flogbóltslandið, har teir bestu leikararnir í heiminum spæla. Scalia Volley Sciacca spælir í Seriu B í Italiu og er staðsett í Sicilia. Seria B er 4. deild í Italia. 

Filip Ilic hevur leikt flogbólt fyri ÍF og kom kappingarárið 24/25 til Mjølnir, har hann var við til at vinna sítt fyrsta føroyameistaraheiti í vaksnamannaflogbólti, tá Mjølnir vann minniligu FM finaluna 3-2 á SÍ á Giljanesi. 

Og ungi kanturin er spentur, nú hann er farin av landinum at royna seg. 

Tíðin í Mjølnir hevur havt stóran týdning fyri mína menning sum leikari, og eg fari altíð at vera takksamur fyri árini og upplivingarnar har. Nú eri eg tó klárur at taka næsta stig og royna meg á hægri støði uttanlands.

Eg havi skrivað undir sáttmála við Scalia Volley, sum spælir í Serie B í Italia, við heimstaði í Sciacca á Sicilia.

Míni mál eru at fáa mest møguligt burturúr hesum møguleikanum, mennast bæði sum leikari og persónur og samstundis leggja mítt til liðið.

Eg síggi hetta sum eitt týdningarmikið stig í míni yrkisleið. Eisini gleði eg meg nógv til at læra nýggju liðfelagarnar at kenna og uppliva italienska mentanina og serligu náttúruna á Sicilia, sigur Filip Ilic við Norðlýsið

Hann sigur upp í 16 gradir í italska býnum Sciaccia, har Filip nú fer at royna sítt flog

Phil Freere er ítróttarstjóri í Mjølnir og hann er errin av at Mjølnir framleiðir leikarar til útlandi. 

Filip hevur eitt stórt flogbóltstalent og vit eru sera spent at síggja hansara menning í Italia. Hann hevur ment seg nógv í Mjølnir. Filip hevur gott at braga til, pápi hansara Boban Ilic var ein framúr flogbóltsleikari. Hann leikti eisini fyri Mjølnir og er nú venjari hjá Mjølnir kvinnunum, sigur Phil Freere ítróttarstjóri hjá Mjølnir. 

Tað er eisini ein fyrrverandi Mjølnir leikari og venjari, ið má nevnast og tað er dámligi argentinin Christian Imhoff, sum er fyrrverandi liðfelagi og vinur við agentin Bruno Romanutti, sum hevur verið við til at fingið handilin í lag, upplýsir Phil. 

Mjølnir í Hollandi í dysti móti Sliedrecht Sport. Filip Ilic nr. 5