Sum so mangan, so vóru tað persónligu mistøkini, sum kostaðu Stjørnuni  dýrt, tá tær í gjár tóku ímóti VÍF. Tað gekk javnt á stóran part av fyrra hálvleiki. Tá leiktir vóru 24 minuttir var støðan 13-12 til VÍF, men tað sum eftir var av fyrra hálvleiki, eydnaðist tað ikki heimaliðnum at fáa mál, meðan VÍF hesa løtuna skoraði fimm ferðir, soleiðis at hálvleiksstøðan gjørdist 18-12 til gestirnar.

VÍF legði hart út í seinna hálvleiki, tá leiktir vóru 6 minuttir av seinna hálvleiki, var leiðslan hjá VÍF økt til 9 mál, støðan var tá 23-14 til VÍF. Stjørnan royndi at svara aftur, og tá dysturin var 53 minuttir gamal, var leiðsan hjá VÍF minkað til 4 mál, men nærri kom Stjørnan ikki, og tað sum eftir var av dystinum, dró VÍF frá aftur Stjørnuni, soleiðis at endaliga úrslitið gjørdist 35-27 til VÍF.

Sum úrslitini annars lagaðu seg, so verða tað Stjørnan og Neistin sum møtast í ”aðrari fjóðringsfinaluni”, meðan tað helst verða VB og VÍF sum møtast í ”hinari fjóðringsfinaluni”.

Skal Stjørnan gera sær vónir um at koma í eina hálvfinaluni, so mugu tær fáa stýr á persónligu mistøkunum, og má nógv meira ferð yvir álopsspælinum, serliga uppspælið til nýtt álop gongur alt ov seint. Hetta eru ting  arbeiðast kann við.

Málini hjá Stjørnuni skutu: Ella L. Samson 6, Tóra Eliasen 5, Iulia Nalvik 5, Durita K. Ljósstein 4, Brynja Høj 2, Eydna  D. Joensen 2, Joan Sørensen, Julia Høgnesen og Julia J. Lydersen 1 mál hvør.