At fáa hvít jól snýr seg um at fáa nóg kalda luft at reka ímóti okkum nóg leingi, og at okkurt dregur guvuna burturúr og ger hana til kava.
Í vikuni, sum júst er byrjað, fer eingin køld luft at reka ímóti Føroyum – tó at høgætt hann verða eina løtu mikukvøldið og/ella hósnáttina.
Næstan alla vikuna fer luft at reka ímóti okkum av landsynningi – í løtum eitt sindur høgri, t.e. av eystri, ella eitt sindur lægri, t.e. av suðuri. Men úr suður-eyst-kvadrantium – haðani fer luftin at koma.
Upprunin hjá luftini er økið yvir havinum nakað væl sunnan fyri Føroyar, so hon er lýggj og slavin.
So vit fáa skifandi vindferð – úr 3 til 8 m/s onkra løtu og upp í 10 til 15 m/s onkra aðra løtu. Einki illveður er á veg hesa vikuna.
Skiftandi avfall, sirm ella samregn – og ímillum har skal væntast ælaveður viðhvørt.
Hitin fer at liggja ímillum 5 og 9 stig.
Tað omanfyrinevnda er als ikki nóg góðar fortreytir fyri kavaveðri í Føroyum. Tá ið hendan vikan er farin, eru vit komin til 20. desember, og eingin byrjandi kuldi at hóma til kava á jólum.
Men, seinnapartin mánadagin í næstu viku fer køld luft at reka ímóti norðaneftir, og so fer at kølna. Týsdagin, mikudagin og hósdagin (24. desember) í næstu viku er ættin væntandi útnyrðingur.
Hesar dagarnar kunnu ælingar við kava koma – men sum tað sær út nú, so kunnu vit vænta hvít fjøll og ikki so nógv meiri ann tað.
Vt fáa at síggja, meðan vit vóna.
