Hvussu stóran part av fráboðaða skattalættanum áljóðandi 105 milliónir ber landskassin ?
Nú kom loksins á mál við útgreining samgongunar, um talan var um skattalætta ella afturbering til kommunur.
Ikki kann sigast, at hendan útlegging var nakar greiður boðskapur, tí hóast Lítla-Samgonga nýtti fleiri dagar, enn Italiumenn brúktu at velja pávan, so er tað framvegis ivasamt, um talan er um skattalætta.
Lyftið varð givið, at landskatturin skuldi lækkast samsvarandi kostnaðinum av uppgávum, ið lagdar vórðu út til kommunurnar. Hesar skuldu so hækka kommunuskattin tilsvarandi. Lyklaorðið gjøgnumskygni skuldi eisini galda í hesum føri.
Hóast kommununar høvdu fingið tað lyfti, at tær skuldu verða hoyrdar í øllum málum, ið vóru kommununum viðkomandi, varð hetta ikki gjørt. Einvíst hækkaði samgongan botnfrádráttin 2000 krónur seinasta ár. Varð hetta ikki gjørt, hevði ein partur av borgarunum ongan lætta fingið, og kostnaðurin bleiv áleið 12 mió í minniinntøkum fyri kommunurnar í 2005. Fíggjarætlan fyri 2006 er løgd; tí vóni eg, at tey stig ið tikin verða og sum hava ávirkan á inntøkuna hjá kommununum eru gjørdar í samráð við hesar. Talan er jú aftur í ár um somu hækking av botnfrádráttinum í lands/kommunuskatti tvs.12 milliónir.
Kári P. Højgaard
løgtingsmaður
