sigur ein stoltur Hans Jakki hjá Dáva, sum í kvøld eins og flest onnur í Føroyum fylgir abbasoninum í sjónvarpsending úr Íslandi.
82 ára gamli Hans Jakki Joensen, vanliga nevndur Hans Jakki hjá Dáva, fylgdið spentur við í íslendsku sendingini – X-Factor.
Tónleikurin annars var ikki júst tað sum fall best í oyrini á abbanum.
– Okkurt betri kundu teir havt at bjóða fólki, var ein viðmerking, tá okkurt undirhald var á skránni.
Men tá kappingarneytarnir royna seg, spílar hann oyrini út, og stilt er, sum í grøvini inni í kamarinum tá Jógvan er á pallinum.
Spurdur um hann heldur at Jógvan fer at vinna er hann ivasamur
– Duettin Hara syngur sera væl, so tað verður trupult hjá Jógvani at vinna, sigur Hans Jakki.
– Nei, eg haldið at Jógvan er nógv betri, sigur Anna, kona Hans Jakku, sum situr undir liðini á honum og fylgir spent kappingini.
Hvørjum hevur hann góðu sangevnini frá?
– Pápi (Dávur í Gerðum) og Kjølbro vóru framúr góðir kvøðarar. Teir eldru mennirnir plagdu at taka til at einki skil var á dansinum fyrr enn teir komu í stovuna.
– Vit vóru eisini nógv ung fólk í húsi á Vágsheygnum og har var altíð tónleikur. Serliga beiggi mín Jóannes dróg nógv ung fólk við inn at syngja og spæla.
– Annars hevur hann óivað góð sangevni frá pápa ættini úr Árnafirði.
Hevur hann ikki sangevni frá tær?
– Noy! – Tað haldið eg ikki, sigur Hans Jakki avgjørdur. Men hann var annars í mong ár partur av Betesdakórinum og eisini hevur hann sungið solo inn á plátu, sum er framleidd í Betesda, so sørur er abbin nokk ikki.
Tá vit fóru út aftur frá Hans Jakka og Annu á Vágsheygnum í kvøld, var kappingin framvegis ikki avgjørd, men abbin ætlaði at sita upp til úrslitið gjørdist greitt.
Hann hevur eisini fylgt abbasoninum í innleiðandi sendingunum, men helt at tær vóru í so seint á kvøldi.
