Vegurin Millum Hjalla er liðugur, so nú sleppa fólk fram at grundstykkjunum har, og fyrsti grundstykkjaeigarin er byrjaður at grava út.
Samanlagt 45 stykki liggja við hendan nýggjasta bústaðavegin í kommununi, sum hevur fingið navnið "Millum Hjalla".
Hetta er tann ovasti av vegunum í hesum býlinginum á eystara armi, sum fevnir um “Millum Hjalla” ovast, “Undir Grashjalla” í miðjuni og “Oman Valrætt”, sum er tann niðasti vegurin.
Seinast vit frættu frá kommununi um “Millum Hjalla”, vóru á leið 24, svarandi til eina góða helvt av grundstykkjunum, seld, so roknast kann við byggivirksemi har, nú vegurin er liðugt gjørdur, hóast fíggjarligu fortreytirnar í samfelagnum í løtuni ikki eru heilt tær somu sum fyri stuttari tíð síðan.
