Landsliðsleikarin er í Danmark og royndarvenur við Vendsyssel í næstbestu donsku deildini.
René S. Joensen, ið hevur verið millum bestu leikararnar hjá HB í ár, fór eftir HB dystin í Europa League í gjár til danmarkar, har hann komandi vikuna skal royndarvenja við Vendsyssel í næstbestu donsku deildini. Frammanundan spælir føroyski landsliðsleikarin Hallur Hansson við Vendsyssel.
– Sum útgangstøði skal eg spæla við í morgin, tá Vendsyssel spælir venjingardyst móti Skive. Og so skal eg venja nakrar ferðir í næstu viku. Eg verið her í hægst eina viku. So má ein bara gera sítt besta og so fáa at síggja, hvat hendir, sigur René S. Joensen við Norðlýsið.
René hevur byrjað inni í 16 av teimum 17 dystunum hjá HB í landskappingini í ár. Sum oftast á sentrala miðvøllinum.
