Heili 81% av partafeløgunum sum landið eigur ella eigur í eru staðsett í Suðurstreymoy. Harumframt eru 67% av vinnurekandi grunnunum hjá landinum og 77% av landsgrunnunum og -stovnunum í Suðurstreymoy.
Heili 81% av partafeløgunum sum landið eigur ella eigur í eru staðsett í Suðurstreymoy. Harumframt eru 67% av vinnurekandi grunnunum hjá landinum og 77% av landsgrunnunum og -stovnunum í Suðurstreymoy.
Nógv mest av bruttovinninginum hjá útflutningsfyritøkunum er í Eysturoy, og lutfalsliga nógv minst er í Suðurstreymoy, Sandoy og Norðstreymoy.
Hetta og nógv annað sæst í eini kanning, sum grannskoðarafyritøkan NUMO hevur gjørt fyri Vinnulívsráðið í Klaksvík.
Sama mynstrið í Danmark
Vinnulívsráðið heitti í fjør á NUMO um at gera eina kanning og frágreiðing um ”staðseting av almennum stovnum” í Føroyum.
Frammanundan hevði Vinnulívsráðið samstarvað við felagsskapin “Staten i hele Danmark”, sum legði grundarlagið undir politisku støðutakanina, sum seinasta ár hevði við sær, at samtykt varð at leggja almennar stovnar út og desentralisera 3.900 arbeiðspláss í Danmark.
Kanningin hjá NUMO vísir, at umframt landsins virksemi, sum er spjatt kring alt landið, verða góð 80% av tí sum fer til meira staðbundnu stovnarnar, brúkt til stovnar í Suðurstreymoy.
Stóran týdning fyri økið
”Royndir úr øðrum londum vísa, at verða útflytingar av landsins stovnum væl fyrireikaðar, staðsettar á hóskandi økjum og økini taka væl ímóti, so hevur hetta við sær menning av arbeiðsmarknaðinum, fakliga og vinnuliga umhvørvinum, útbúgvingarstovnum v.m. á staðnum,” stendur í niðurstøðuni hjá NUMO.
”Ávirkanin er sera miðsavnað rundan um staðsetingina av nýggju almennu arbeiðsplássunum.
Í flest øllum øðrum førum kann landsins virksemi staðsetast kring landið, ikki minst havandi í huga góðu samskiftismøguleikarnir, ið eru nú á døgum, og uppaftur betur fæst í lag ein felags talgild skipan fyri alt landið,” stendur í niðurstøðuni.
Kanningin sum NUMO hevur gjørt fyri Vinnulívsráðið í Klaksvík er fíggjað av vinnulívsfyritøkum í Klaksvík.
Í nevndini fyri Vinnulívsráðið sita:
Karl Birgir Isaksen, formaður
Hilmar Danielsen, næstformaður
Elsubeth Poulsen, peningarøkil
Rani Nolsøe, nevndarlimur
Heini Hansen, nevndarlimur
Jógvan við Keldu samskipari
