Á býráðsfundinum í kvøld skal Klaksvíkar Býráð taka støðu til eina umsókn frá Bakkafrost um at hegna bryggjukantin við Krivjing á vestara kajøki. Sambært uppskotinum verða 50 metrar av bryggjukantinum stongdir og kunnu einans nýtast av Bakkafrost.
Frágreiðing um málið:
Bakkafrost hevur enn eina ferð vent sær til kommununa við umsókn um at fáa loyvi at brúka partar av vestara havnalagnum, frammanfyri Kryvjing, til landstøð. Talan er um eina atløgusíðu á uml. 50 metrar, sum skal girðast inni, soleiðis at øll ferðsla verður hildin burtur frá økinum, og í staðin verður atgongd til og frá bryggjukantinum og beinleiðis inn í húsið.
Umsitingin hevur verið á fundi við umboð fyri Bakkafrost og Heilsufrøðiliga Starvsstovuna, har tey upplýstu, at um ikki økið kann verða varandi avbyrgt, fær Bakkafrost ikki umhvørvisgóðkenning og harvið heldur ikki loyvi at seta smolt út á aliøki A-12, sum er undir Kunoyarnesi.
Samband hevur verið millum kommununa og Bakkafrost um at finna eina loysn á trupulleikanum, men hetta hevur ikki eydnast.
Kommunan hevur í fleiri umførum víst á, at kravið um at læsa økið av ikki kann gangast á møti, og hevur roynt at vísa á aðrar møguleikar fyri staðseting av landstøð. T.d. hevur verið víst á økir uttanfyri bygt øki á Grótrætt og Strond, men hesi hava ikki havt áhuga hjá Bakkafrost at arbeiða víðari við.
Eisini er roynd gjørd at finna onnur hølir á økinum við vestara havnalag, men hetta hevur heldur ikki borið á mál.
Umsitingin metir tað sera óheppið at byrgja økið á havnalagnum av. Havandi í huga, at annað virksemi er í økinum, sum javnan hevur tørv á ferðslu eftir bryggjuni.
Bakkafrost hevur boðið sær til at hava økið opið ávísar dagar, t.d. á Norðoyastevnu, men hetta er bert talan um 2-3 dagar árliga.
Um so er, at umbønin frá Bakkafrost verður gingin á møti, verður mælt til at hetta verður at galda í mesta lagi fyri trý ár, og at leigugjald verður ásett í mun til økið, sum verður avbyrgt. Samstundis skal Bakkafrost koma við ítøkiligari ætlan um, hvar og hvussu framtíðar landstøð skal skipast fyri aliøkið A-12.
HaVN 17-09-2018
Ein meiriluti: Tummas J. Lervig, Kristian Eli Zachariasen og Óli M. Lassen mælir til at geva fyribilsloyvi, ið ikki kann endurnýggjast, til økið frá 1. november 2018 til 1. mai 2021, treyta av at økið verður opið tá almenn tiltøk eru í kommununi við tilknýti til havnaøkið við landstøðina. Samstundis verður heitt á Bakkafrost um at koma við uppskoti til varandi loysn til landstøð í aliøkið A-12.
Ein minniluti: Atli S. Justinussen og Beinir Johannesen mæla frá at geva loyvið, við tí grundgeving at havnaøkið/bryggjukant verður avbyrgt.
Nevndin vísur á, at møguligur leigusáttmáli fyri havnaøkið og bryggjukant, verður lagdur fyri nevnd til góðkenning áðrenn undirskrivað verður.
Sí skránna fyri býráðsfundin í kvøld
