Hann melur av ymsum ættum seinnapartin í dag. Um nakrar tímar fer hann at koma av landsynningi-suðuri, og vit fáa ælaveður við kava.
Tað er eitt lágtrýst, sum fer tvørtur um norðara part av Føroyum í nátt, sum stendur fyri veðrinum í kvøld og í nátt og stóran part av morgindegnum.
Heit luft vestaneftir fer at trýsta hesa køldu luftina vekk – tað verður nakað fyri midnátt í kvøld. Eftir tað er fer ættin spakuliga at krúpa seg ímóti útsynningi-vestri, meðan tað regnar nokkso fitt kring alt landið.
Út á morgunin fer vindurin at minka, men fram ímóti middegi fer ættin at støkka upp í landnyrðing, og tað fer at kava. Vindferðin fer at veksa upp í 15 til 20 m/s.
Hetta er tó ikki at varða leingi, tí nakað út á seinnapartin slítur í, og eina løtu eftir tað fer vindurin at minka, og ættin fer yvir í útnyrðing-norðan, soleiðis sum tað hevur verið síðan páskamorgun, og soleiðis sum tað kann roknast við at ættin fer at liggja næstu nógvu dagarnar.
Í annaðkvøld eru 10 til 15 m/s av útnyrðingi-norði og kavaæl.
