Fleiri av okkum minnast óivað til, tá Norðlýsið í 2017 skrivaði um ein “stjóra” á einum útróðrarbáti, sum kom sera illa fyri av einum skaða hann fekk á útróðri. Teir vóru tríggir, sum áttu bátin, ið maðurin var við hendan túrin. Teir høvdu stovnað sær partafelag, og hetta kravdi, at ein teirra bar heitið “stjóri”. Tað var maðurin, sum Norðlýsið skrivaði um. Hann mátti leggjast uppi í longri tíð, orsakað av skaðanum hann fekk í hondina.
Hetta kom honum illa við, tí orsakað av, at hann bar heitið “stjóri”, kundi hann ikki fáa dagpening, og tá hann ikki hevði nakra eyka inntøku av heitinum, gjørdist hetta honum ein drúgv tíð við ongari peningaligari inntøku.
Tá vit komu í samgongu í 2019 setti eg mær beinanvegi fyri, at hetta var eitt mál sum skuldi loysast. Sum táverandi landstýriskvinna í almannamálum tók eg málið upp og gjørdi uppskot til broytingar í lógini um sjúkradagpening. Hesi fólkini skuldu ikki detta niður ímillum í sjúkrastøðu. Uppskotið bleiv sent til hoyringar, har hendan støðan skuldi broytast.
Í dag kunnu vit fegnast um, at eitt samt løgting tók undir við broytingunum í løgtingslógini um sjúkradagpening. Broytingarnar hava millum annað við sær betri karmar til smærri fyritøkur og íverksetarar.
Hetta er eitt mál, sum hendan samgongan tók upp og sum nú eitt samt løgting tók undir við. Eg fegnist um hetta.
Fólkaflokkurin er ein sosialur flokkur eisini.
